Paggena:Poesie napoletane - Ferdinando Russo.djvu/44

'A Wikisource.
Chesta paggena è stata leggiuta.
MARIUOLE 'E NOTTE


—Neh! Signò!... C'ora so'? C'ora tenite?
—Nun 'o porto... Nun aggio che ve fa...
—Faciteme verè... Va be'! Sentite...
Mo' si sit'ommo, m''ite 'a fa fumà.

—Ma...— Votta lloco, me'! Nun v'avvelite...
è n'arta comm'a n'ata, e v''ite 'a sta!
—Ma... Ma, insomma, ve dico... che vulite?
—Appila! ¹) Statte zitto e n'alluccà!

Bello! Accussì! T'è scesa 'a lengua nganna?
Niente. Nu rito d'acqua turriacale...
Nun c'è che fa! Dio accussì t''a manna...

E... che facite mo'? Ve retirate?
Attiento a vuie quanno saglite 'e scale...
Santanotte, signò... Nun v'avutate.