Paggena:Poesie napoletane - Ferdinando Russo.djvu/235

'A Wikisource.
Chesta paggena è stata leggiuta.
233
piccola borghesia


«SI LOCA QUARTINO»


I.


Neh purtinà, ched'è chisto quartino?
— Signò sò quattro stanze e 'a cucenella,
na sala, na luggetta e 'o mezzanino...
— Ma dice c' 'a mesata è carulella?

— Chi ve l'ha ditto? Chille 'e de Martino?!
Signò, chella è na gioia 'e casarella!
Sittanta lire e ll'acqua d' 'o Serino
proprio 'o mmeglio d' 'a strata 'a Speranzella!

Chillo, 'o fatt'è, ca nun se ne vonn'ì!
Appena sanno ca quaccuno vene,
signò credite? me fanno avvelì!

N'ata casa accussì chi v' 'a vo' da'?
— Se po' vedè? — Saglite, signurì!
(Io ll'aggio ditto= E ll'aggia fa affittà!)