Chesta paggena è stata leggiuta.
— Ma che fai? Addò miette stu craparo?
Chillo te leva tutt' 'a visuale!...
S'ha da mettere accanto all'animale!
E leva 'a lloco chisto zampugnaro!
— E addò se schiaffa? — Ma, cretino caro,
ched'è, presepio, o fosse funarale?!
Comme! Uno appriesso all'ato! 'O castagnaro,
'o scartellato, 'o turco e 'o spezziale?
Distribuisci! Fanne una scenetta!
Nu gruppetto c'almeno fa figura!
Che significa, llà, chella carretta?
E chella pacchianella dint' 'o sciallo!
Chella! Chella che porta 'a criatura!...
M' 'a piazze sott' 'a coda d' 'o cavallo!
