Chesta paggena è stata leggiuta.
215
poemetti del cuore
Io te pozzo vasà! Sta vocca, crideme,
nun ha parlato maie male d' 'a gente!...
Comme trattava a te trattava all'aute!
Nun s'è spurcata 'e niente!
E chisto core? Avrà pututo credere
ca tutte ne tenessero tantillo...
S'era sbagliato, oi mamma mia! Perdònalo
Mo' torna... Pigliatillo!
Da quanno, a cunzularme 'e tanta spàseme,
me vasaste e diciste doi parole,
io me sentette rischiarà chest'anema
meglio 'e nu raggio 'e sole!
Sì sì! Stongo cu te!... Sì, sì, cuntèntate!
Rideme sempe cu sta vocca doce!
Me sape cunzulà meglio 'e nu balzamo
'o suono 'e chesta voce!
L'ammore 'e mamma, tuttuqante 'o ddìceno,
è 'o vero ammore, è chillo ca nun more!...
Viene ccà, viene ccà... sti ccose pàssano!
Rieste tu sola, dint'a chisto core!...
