Chesta paggena è stata leggiuta.
- 19
Da n'auta parte une se priparava
na bobba ¹) pe se fa nturzà ²) na mano;
nu cecato cu ll'acqua se sciacquava,
e doppo ll'uocchio lle turnava sano.
Pe na jucata ³) nce s'appiccecava.
«Tu si' curnuto! E tu si' ruffiano!»
Uno mbrugliava e n'auto jastemmava!
Nun sentive na voce 'e crestiano!
Tre fattucchiare, attuorno a na pignata,
vullevano ⁴) serpiente e lacertune,
scunnettïanno ⁵). N'auta, speretata,
cu nu gliuòmmero ⁶) nnanza, chino 'e spille,
nguacchiato ⁷) 'e sango 'e quatto scurpiune,
scungiurava, sceppannose 'e capille.
