Chesta paggena nun è stata leggiuta.
III.
Albero ’e pigna mio càrreco ’e pigne
tu crisce sempe e chisto core chiagne !
Passai na sera e lle facette signe,
essa redette mmiezo a li compagne.
Passai ’o juorno appriesso e steva sola,
ma nun sapette dirle na parola,
passai ’a notte e mo’ nce passo sempe,
ma dint’ ’o core mio fa malutiempe !
IV.
Vurria ca nzuonno tu m’accumparisse
e senza fa rummore t’accustasse ;
t’acalasse nu poco e me dicisse
ca me vuò bene, e io l’anduvinasse ;
e po’ vurria ca nfaccia me redisse,
e cu sta vocca ’e rosa me vasasse ;
ma chisto è suonno! Io me te sonno spisse !
Ah, ca la Morte cchiù nun me scetasse !
