Chesta paggena è stata leggiuta.
149
poemetti del cuore
Na vota ’o core mio cantanno jeva
allecramente ’a bella passione,
e ’a bella passione rispunneva
cu tutt’ ammore e tutt’ ’a spressione!
Luceva ’o sole ’a reto a li mmuntagne,
l’aria serena steva attuorno a me,
adduràvano ’e rrose int’ ’e ccampagne
e ’a luna ’a cielo me parlava ’e te!
E me diceva : « Quanto si’ felice!
Tiene na stella ’nfronte e n’ auta ’ncore!
’O pparlà chiaro è fatto pe ll’ amice,
tutto te canta attuorno : Ammore Ammore!
E me diceva pure n’ ata cosa !
Me diceva ca tu, sultanto tu
me dive ’a vita prufumata ’e rosa,
e ca st’ ammore nun mureva cchiù!
