Chesta paggena è stata leggiuta.
133
poemetti del cuore
Io te saccio! Nun ridere! Te saccio!
Nun ne putive cchiù, t' ire stracquata,
tu, ca m' 'e fatto addeventà nu straccio!
So' n' ommo? No! So' n' anema dannata!
Nun trovo requie cchiù, nun trovo pace,
tengo sete d' avè na curtellata...
Sulo accussì me pozzo fa capace
ch' è meglio 'a morte, ncopp' 'a chesta terra
addò l' ammore nun è cchiù verace!
Quanta veleno chisto core nzerra,
e dint' e vvene quanta freva coce!
E dint' a stu cerviello uh quanta guerra!
Mo' parlo sulo, e me fa senzo 'a voce!
Pare nu brutto suonno 'e fantasia...
E m' allicorda n' ato suono doce...
Me vene sempe mmocca na parola,
nu nomme; 'o nomme tuio: che frenesia!
E ancora a te, stu scemo 'e core vola,
e t' aggio perza! E nun si' cchiù d' 'a mia!
