Paggena:Poesie - Salvatore di Giacomo.djvu/41

'A Wikisource.
Vai alla navigazione Vai alla ricerca
Chesta paggena è stata leggiuta.
37
voce luntane


LETTERA MALINCONECA.

Luntana staie. Natale sta venenno:
che bello friddo, che belle ghiurnate!…
Friddo o paese tuio nne sta facenno?
Pe Natale ve site priparate?

Luntana staie… No… siente… nun è overo,
t’aggio ditto ’a buscia… Chiove a zeffunno…
mme se stregneno ’o core e lu penziero…
nun ce vurria sta’ cchiù ncopp’a stu munno!

Nun ce vurria sta’ cchiù sulo penzanno
ca fa tant’acqua e nun te sto vicino…
Pe nascere e murì na vota l’anno
che brutto tiempo sceglie stu Bammino!…

Basta, che faie?… Di’… che te dice ’o core?
Aggiu pacienzia… io scrivo e scasso doppe…
nun tengo a capa… Te manno stu sciore,
astipatillo ’int’ ’a stessa anviloppe…