Chesta paggena è stata leggiuta.
131
canzone
SERENATELLA.
IO nun ve saccio, ma mme figuro,
nchiudenno ll’uocchie de ve vedé…
Mme cumparite dint’a lu scuro,
site nu zucchero, site, nenné!
La luna sta aspettanno,
pur essa vo’ sentì:
vede ca sto cantanno,
ma nun sape pe cchi!…
Vuie mme credite? Senz’arricietto,
mo cchiù cuieto nun pozzo sta’…
mme s’è appicciato lu ffuoco mpietto,
ce vo’ nu mare pe lu stutà!…
La luna sta aspettanno,
pur essa vo’ sentì,
vede ca sto cantanno,
e vo’ sapé pe cchi!…
