Chesta paggena è stata leggiuta du' vote e mo è fernuta.
STELLA MATUTINA.
Che faie, tu sola, oi’ stella matutina,
mmiez’’o cielo? Che faie, rimpetto a me?
Lasse ’a muntagna, e ’a parte d’’a marina
te veco, chiano chiano, scumparé.
Cammine? E cammenammo ’n cumpagnia.
Cchiù ghianca te si’ fatta; ma pecché?
Ah! È ghiuorno! È ghiuorno già, cumpagna mia!
Luntano veco ’o mare accumparé.
Torno a guardà. Ma tu si’ scumparuta,
mmiez’’o cielo lucente, nnanz’a me.
Stella mia, stella mia, te nu si’ gghiuta!
Comm’era bello a cammenà cu te…
