E pparte ’n Scizeia, e all’isola de Creta,
Dinto a ll’Oasse a ffa passà la seta;
Parte pe nfi a Nghretterra
Chella, che stace quase da lo Munno
Spaccata ’n miezo maro.
Chi sa se chiù, dapò de luongo tiempo,
E na manejata d’anne,
A bedè tornarraggio
La Patrea, e sto pagliaro poveriello,
Sto campo a mme chiù caro de no regno.
Addonca no sordato,
Senza piatà, e ccrejanza
S’ave d’anghì la panza,
S’ha da tenè ste tterre accossì grasse,
No barbaro, sti belle semmenate
Ecco addò la discordia, e la guerra
Cevile nc’ha redutto,
Ecco pe chi ste belle massarie
Hanno ngrassato le ffatiche mie.
Nzerta mo Melibeo le ppera, e mmiette
’N fila le bite, guarda, che n’aspiette?
O Crape (mandra na vota felice,)
Jatevenne, o crapette,
Ca maie chiù, dinto no cafuorchio stiso,
Ve vedarreggio pennere
Da na ripa de spine
Chiù cantare non voglio,
Nè ccrape cchiù co la perzona mia
Jarrite a rrosecare
Scioruto citeso, e salece ammaro.
Ti-
