Titero
Lo sfivolo de stare a llebertate
Fu chillo, che co pede de cestunea
’N fine me jonze, e me tenette mente
Quanno già aveva lo mostaccio janco,
E me grattava senz’arte lo scianco.
Nn’è passato, è lo vero, muto tiempo,
Meglio tardo, che mmaje:
Mò ch’Amarille ’n core
Mme tene con ammore,
No mme ne curo chiù de Galatea,
Magno, vevo, m’abbotto, e campo a sciore,
Ca quanno me teneva Galatea,
(Lo boglio di strellanno,
Ca sta capo no sbaglia,)
Steva ’n catena senz’avè na maglia,
Co ttutto ca portava
A la ngrata Cetate spisso spisso
Ajenielle grasse de le mmandre meje,
Casofrisco, e rrecotta,
Mme veneva la gotta,
Pocca me ne tornava
Co te mmano vacante
Sbriscio senza no callo de contante.
Melibeo
Mo capesco Amarille pecchè affritta
Tutte li Deie chiammave,
Pecchè te contentave
De lassà senza cogliere le ppumme,
Le pprune cogliepiecoro, e le ffico,
Titero tujo non c’era; e mmo capesco
Pec-
