Paggena:Opere inedite di varj autori - Tomo I (1789).djvu/162

152

La Paggiaria

Ma non parlo de chesto.
Dico, ca mo n’è ttiempo
De cammenare: ca no pierdetiempo
De ssi trastulle te leva de siesto.
E uno sulo nce va pe sse strate!
Ne scunte le caterbie: mpacchiature,
Pollecenelle, Covielle, Dotture,
E chi nò, che non mereta pretate!
Indie passa quaccuno, lo ntornejano:
Se lo mettono ’n miezo, e lo scervellano:
Chillo stà zitto: e lloro se spestellano
A ddì; e comm’a mpiso lo carrejano.
Chi te sbruffa de vrenna, e chi te nchiacca
Co no chilieto janco lo cappotto,
(Tanto se vaie de passo, o vaie de trotto)
O na coda l’appenneno a na pacca.
Pe li malanno tuoie po te no vaje:
E beccote na mmorra de verrille,
Che te zompano appriesso comm’a grillo:
Vi ca l’haie strellanno, vi ca l’haje.
Vide ciert’aute, co n’ardegna ’n mano,
Che pare na valesta co no cuoppo:
Quanto de botta te siente no schiuoppo,
Mente strillano: All’uocchio, ch'è pacchiano.
Pecchè chillo che porta la valesta,
Piglia la mmira, e dice, all’uocchio all’uocchio
E te siente a na ciglia no pastuocchio.
Nzo do nnommena nsomma, o ’n pietto, o ’n testa,
De pallottole sciocca na tempesta.
Non daie tre ppasse, e scunte p’ogne bia
Marcangegne a bezzeffie,

Che