Peppeniello. Mà, quanno annuommene a chella figliola, t’haie lavà primma ’a vocca cu l’acqua ’e rosa! Sacce che chella pe mò è ’a nammurata mia, e fino a tanto che fa ammore cu Peppeniello ’o sparatore, nisciuno, manco si turnasse patemo dall’auto munno, le diciarria nu ttecchete!
Gennaro. (I paladini di Francia).
Carmela. Uh! faccia mia! Avito ntise? M’aggio ’lavà ’a vocca quanno annommeno a chella!!… nfaccia a na mamma, e na sora zita tu dice sti cose? Sciù! ma scuorno nun ne tiene cchiù, piezzo ’o sbrjugnato!
Peppeniello. Mà, mà, nun me fa saglì ’o sanghe a parte d’a capa… pecchè io nun saccio chillo che faccio!
Carmela. Che faie, lasseme sentere? Aize ’e mmane ncuolle a mammeta? E sulo chesto nce mancarria pe essere propeto n’assassino!
Ngnesella. (abbracciandola) Mammarella mia cara, cara, nun te piglià collera, penza ca chillo m’è frate!
Nicoletta. Mena mò, commarè, e nun ve pigliate collera chillo mò v’obbedisce. Gennarì, dille tu quacche cosa?
Gennaro (Vi comme vò ncuietà a me chesta!) E più di quello che gli ò detto, chillo nun m’à voluto sentere.
Carmela. Siente, piccerì, tu da chella porta nun ghiesce, primme m’aie d’accidere a me. Si haie core da fa chesto, allora accideme pure mò che faie buono! (si mette innanzi alla porta di fondo)
Peppeniello. Mà, mà, lasseme passà! Pienze che quanno Peppeniello ha data na parola, se ne cade ’o munno, ma chello à dda essere!
Carmela. Ah! nun me vuò sentere? Embè, io mò me metto allucca a coppa ’a fenesta, chiammo ’e guardie e te faccio arrestà c’’o revolvere ncuollo, è meglio vederte carcerato, che venirte a vedè dinto a nu spitale.
Peppeniello. Mà!... nun fa chesto che io me sonne nu brutto suonno!… ccà stanotte fernesce male ’a iucata!
Ngnesella. Totò. Totò, miettete pe mmiezo, dincello tu pure na parola; pò essere che a te te sente.
Totonno. Va Peppeniè, chesta che cos’è, e forniscila mo, non da cchiù collera a mammeta!
Peppeniello. Statte zitte tu, che te mmisco a fa mmiezo? Tu m’haie da essere gainato perciò non te pozzo dicere niente. Tu capisce annore che vene a dicere? Io songo nu guaglione annurato, e tutte m’hanna rispettà!
Gennaro. (Vediti che specie d’onore è ghiuto trovannò chisto)
