D. Amalia. Vattenne! Vattenne, ca nun me fido manco ’e te guardà!
Rusella. Ma ch’aggio fatto, ch’aggio fatto ca me disprezzate ’e chesta manera?…
D. Amalia. Chello ca fanno ’e femmene perdute!…. M’’e ngannato nu figlio, m’è ngannato!…
Rusella. Ngannato, è overo! Che v’aggia risponnere? Vuie site ’a mamma, e io, pe quanto me putesse disculpà, so’ sempe na scellarata nfame a l’uocchie vuoste… Ma però sta scellarata, ll’ha vuluto bene assaie a Aniello: è prova va ne sia ca mo, mentre isso sta murenno, se trova nnanze ’a porta d’’a casa soia.
D. Amalia. Pe le venì a dà l’uoglio santo!…
Rusella. Io?!…. E cu che core ’o putite di, Donn’Amà? E’ peccato murtale! Sultanto chillo Giesù Cristo beneditto, ca p’’e peccate nuoste hanno miso ncroce, po sapè chello ca ce sta cca dinto… (Si tocca il lato del cuore).
D. Amalia. Nun ’o iastemmà! Statte zitta!…
Rusella. ’O iastemmo?… E già! Dicite buono, pecchè io so’ stata ca l’aggia miso ncroce… È ovè, Giesù Crì, so’ stata io ca t’aggio nchiuvato lloco nfaccia?… Si, si, sò stata io, e mm’’o mmereto d’essere trattata accussì!… Ch’aggia fa’? É o destino nfame ca me perseguita!…
