Paggena:No, no... sí... (1906) reduced scores.djvu/1

N. 54

 

NO, NO… Sí!…

Versi di S. di Giacomo

⁠

Musica di Rodolfo Falvo

---

I.

Ah, che belle - uocchie nire ’e velluto,
che capille - Nannina teneva!
Che parole - azzeccose sapeva!
E comm’era - cianciosa cu me!
Pe tre mmise - stu ffuoco aggio ’ntiso
comm’ardeva - e comm’era cucente:
e a stutà - chesto ffuoco apparente
mm’è abbastato - nu juorno e nu’ cchiù…
Pecchè Nannina…
No,
Chella nun fuie ca vulevo i’…
E io ll’aggio ditto:
- Amice - ma nient’ato:
e addio! Bonnì!..

II. Mme credevo - ’e truvà cu Carmela na buntà - cchiù sincera e amurosa: ma Carmela - era troppo gelosa, e pecchesto - l’avette lassà…. Carulina - ’a truvavo chiagnenno, si tardavo - mez’ora surtanto: ma sta smania - sta nziria e stu chianto mme piaceva - ogne tanto ’e vede’!.. E Carulina… No, manco era chella ca voglio i’! E io ll’aggio ditto. - Addio! - Trovete a n’ato, oi Caruli!..

⁠

III. Mo cu n’ata - e si tu! - mme so’ perzo! Pe te sola - st’ammore mme pogne! Tu mme sbrane - stu core cu st’ogne! Tu mme faie - lentamente murì!.. Tu mme tiene - e mme strigne int’’e mmane! Tu mme vide - tremmà sti denocchie! Ma mme guarde - redenno, int’a ll’uocchie, e mm’affierre - e mme tuorne a lassà!.. E io dico - io dico: Si! Chella si tu e’ aspettavo ’i! Fa ’e me chello che buo’! Sto mmano a te! Famme murì!..

---

Proprietà dell’Editore - R. IZZO Napoli - Riproduzione vietata

Musica per Canto e Pianoforte — Nette L. 1,50

Dirigere esclusivamente le ordinazioni alla Casa Editrice R. IZZO-Piazza Dante 32, 33, 55-Napoli