Na Santarella
_Gue, papà, voglio vedere
Santarella a Sannazzaro…
Si, fammillo sto piacere
Papà bello, caro, caro!
_Figlio mio, nce simmo stato
Sette vote…
_E che bo dire…
Io me songo recriato
Via, tornammela a sentire!
_De recrio non ne parlammo
Ca si no me faie nfucà!
_Nonsignore, nce spassammo…
E vuie pure…
_Embè…
_E già!
Santarella, Santarè
Mo turnammo a te vedè!
Vi che folla, ch'ammoina
Chi vo palche e chi bigliette.
Simme iuto stammatina
Ch'era primmo de li sette
E pe grazia nce hanno dato
Sesta fila arreto arreto.
Lo chhiù meglio era affittato
Da signure e miezo ceto!
Chi strillava: – na pultrona!
_Iammo, lesto, miette ccà…
_E ch'hai fatto, non è bbona…
_Chesta tengo…
_Embè…
_E già!
Santarella, Santarè
Tu si bona, e over'è!
Da sittantasette sere
Se fa sempe Santarella,
Tutte correne a vedere
Sta commedia tanto bella.
Dunche pare che Scarpetta
Pure dinto Sannazzaro
Ienghe sempre la cascetta
E a zeffuno fa denaro!
Quaccheduno assicurava
Che pezzenno ieve llà…
Che llà dinto s'atterrava
Uh! che ciuccio!
_Embè…
_E già!
Chille crepano Scarpè…
Santarella, Santarè!
Cav. E. Scarpetta
