Paggena:Montecassino - Ferdinando Russo.djvu/47

- 45 -

- 45 ~
Ma niente! ’Ncielo avevano già scritto
ca nisciuno m’ avesse rispunnuto,
ca tutto, attuorno, fosse stato zitto !

So’ vivo, e stongo dint’ a nu tavuto !
Parlo, e so’ muorto! Cerco, ma nun trovo...
San Beneditto manco m’ ha vuluto !...

E penzo, e chiagno, e sonno, e me cummovo,
e guardo ’ncielo pe vedè na stella,
e ’npietto a me nu malo schianto provo...

E, comm’ ’o carcerato int’ ’a cancella,
che vede vulà ’o passero pe ffore,
desideranno ’a libbertà nuvella,

io, stritto int’ a stu carcere ’e delore,
passero sulitario e scunzulato,
veco a tre cuorve strazziarme ’o core !...

Pure tre cuorve, t’ hanno accumpagnato,
San Beneditto mio, ncopp’ a lu monte
addò d’’a Voce ’e Dio fuste chiammato!

Ma tu tenive ciento stelle ’nfronte!
Nun ire comm’ a me, stracciato e nchiuso
da mille sèpe ’e spine a mille pónte !