Chesta paggena è stata leggiuta du' vote e mo è fernuta.
eduardo scarpetta
me dà cinche lire, nce vulette la mano de lu Cielo!
Luis. E che vulite, io chillo oggetto teneva, a la fine na sarta era, e chellu ppoco d’oro me lu faceva cu la fatica.. Si avesse fatto l’ammore io pure cu nu signorino... (marcato)
Pup. Mammà, l’ave cu mmico?
Conc. (Ma tiene mente! Chesta comme vo' ncuità la gente!) Guè, D.a Luisè, si figliema fa l’amore cu nu signorino, nce fa l'ammore onestamente, e tu nun si degna de parlà de sta guagliona, sà, pecchè li fatte tuoie se sanno.
Luis. D.a Conce, li fatte mieie so’ chiare, e parla comme haie da parlà, si no te rompe la capa!
Conc. A me me rumpe la capa? Vattenne, zantraglia!
Luis. Uh! vi chi parla! Ma che, te si scurdata che frateto è solachianiello?
Pup. Uh! Zi Zio è solachianiello, neh mammà?..
Conc. Nun le dà udienza, figlia mia, chillo fa le scarpine de raso a tutte li ballarinole de S. Carlo, e quanno s’annommena a Masto Mmalora nun se passa cchiù nnanze.
Luis. Oh, chesto è overo, chillo fa buone affare cu li ballarine...
Conc. Luisè, statte zitta, si no ogge te tiro tutte li capille da la capa.
Luis. Tu a chi tire li capille, a chi? (gridando).
Conc. A te! a te! (gridando).
Pup. A te! Si, a te! (gridando. Di dentro suona il campanello).
Conc. Io chiacchiere nun ne faccio, me piace de fa li fatte
