Paggena:Mamma mia che vo' sapé?! (1909).djvu/2

'A Wikisource.
Jump to navigation Jump to search
Chesta paggena è stata leggiuta du' vote e mo è fernuta.

Mamma mia che vo’ sapè?!

Versi di Ferd. Russo  

Musica di E. Nutile


I.

Quanno ’a notte se ne scenne
p’abbruscià chist’uocchie stanche,
quann’io veglio e tu me manche,
sento ’a smània ’e te vasà!
E te chiammo, e schiara juorno,
ma è pe l’ate stu chiarore!
Tengo ’a notte, dinto ’o core
e nun pozzo arrepusà!
Ah, nun me fa murì!
Tu che ne vuò da me?
Mamma mia me vene a dì
pecchè
chesta smània nun me vò
lassà!
Ah nun me fa murì!
Tu che ne vuò da me?
Mamma mia che vò sapè?
Mamma mia c’ha da appurà?!
Nun me fido d’’a vasà!…

II.

Mamma mia, sta vicchiarella
ca me guarda pe gulìo
e andivina ’o core mio
tale e quale comm’a te.
Mamma mia me vene appriesso
cu na faccia ’e cera fina,
e me guarda, e n’andivina
chesta freva mia ched’è!…
Ah, nun me fa murì!
Tu che ne vuò da me?
Mamma mia nun pò capì
pecchè
chesta smania nun me vo
lassà!
Ah, nun me fa murì!
Tu che ne vuò da me?
Mamma mia te sape a te
comm’a n’angelo ’e bunta.!
Mamma mia c’ha da appurà?!
Ah!..
Mamma mia c’ha da appurà?!