Paggena:Lo cunto de li cunte - Tomo I.djvu/368

368

LA STUFA

C. Viato chi lo fuie,
     Arrasso sia da me, guarda la gamma!
     Pierde li iuorne, si non pierde argiamma.
G. E li trattenemiente,
     Che so’ de manco riseco e chiù gusto,
     Puro te danno sosta:
     Le farze, le commedie e sagliemmanche,
     La femmena che sauta pe la corda,
     Chell’autra co la varva
     E chell’autra che cose co li piede,
     Li mattaccine co li bagattielle,
     La crapa che va ’ncoppa a li rocchielle:
     ’nsomma stufano tutte li solazze,
     E boffune e fazieze e sciuocche e pazze.
C. Perzò solea cantare Compa’ Iunno:
     Non è gusto durabele a sto munno!
G. La museca è na cosa che te vace
     Pe fi’ a l’ossa pezzelle,
     Co tante varietà de garbe e muode,
     Trille, fughe, volate e gargariseme
     E fauze e retopunte e passacaglie,
     Co voce malanconeca od allegra,
     O grave o a sautariello,
     Ped aiero o co la parte
     De vascio o de fauzietto o de tenore,
     Co stordemiente da tasto o da shiato,
     E co corde o de niervo o de metallo:
     Pure ogne cosa stufa,
     E, si non stai d’omore,
     E t’abbottano niente li permune,
     Scassarrisse teorbie e colasciune!
C. Quanno no sta lo cellevriello a siesto,
     Canta e verna che vuoie,
     Canta puro lo Stella e lo Giammacco,
     è peo na sinfonia che lo sciabacco.