Paggena:Lo cunto de li cunte - Tomo I.djvu/268

'A Wikisource.
Chesta paggena nun è stata leggiuta.
268
Trattenimiento II.

LA PENTA MANO-MOZZA

TRATTENEMIENTO SECUNNO

DE LA IORNATA TERZA Penta sdegna le nozze de lo frate e, tagliatose le mano, ’nce le manna ’m presiento; isso la fa iettare drinto na cascia a maro; e data a na spiaggia, no marinaro la porta a la casa soia, dove la mogliere gelosa la torna a iettare drinto la stessa cascia, e, trovata da no re, se ’nce ’nzora. Ma pe trafanaria de la stessa femmena marvasa è cacciata da lo regno e, dapo’ luonghe travaglie, è trovata da lo marito e da lo frate e restano tutte quante contiente e conzolate.

Sentuto lo cunto de Zeza, dissero de commune parere che ’nce voze chesto e peo a Cannetella, che cercava lo pilo drinto all’uovo; puro avettero consolazione granne de vederela sciarvogliata da tanto affanno e fu cosa da considerare che, dove tutte l’uommene le spuzzassero, fosse arreddutta a ’ncrenarese a no chiavettiero perché la levasse da tanto travaglio. Ma facenno mutto lo re a Cecca che scapolasse lo cunto suio, essa non fu tarda a parlare, cossì decenno:

Ne li travaglie la virtù se coppella e la cannela de la bontà dov’è chiù scuro chiù straluce e le fatiche partorisce