Paggena:Lo cunto de li cunte - Tomo I.djvu/254

     Chiammannolo sfrontato, miette nante,
     276Pideto mbraca, fronte a pontarulo,
     Strenga rotta ndozzana,
     Sfacciato, petrosino d’ogne sauza,
     Che vo mettere sale a quanto vede,
     280Che vo dare de naso a quanto sente,
     Ntrammettiero, arrogante, mpacciariello;
     Auzate chesso, e spienne, poveriello!
Mar. Noe vole chesto e peo;
     284Lo Spagniuolo la ntese,
     Che disse, ha no gran piazzo:
     La muccia chella es causa de despriezzo!
Col. Si n’ommo pe ventura
     288Parla sperlito, chiacchiara e trascorre,
     E fa pompa de nciegno e de loquela,
     E dovonca lo tuocche o lo revuote
     Lo truove spierto; e te responne a siesto;
     292Sta tenta l’arreduce de manera,
     Che n’auza no cappiello
     De no parabolano cannarone,
     De na canna de chiaveca,
     296D’uno, che darria masto a le cecale,
     C’ha chiù parole, che non ha na pica,
     Che te ntrona lo capo, e te scervelleca,
     Co tante paparacchie e filastoccole.
     300Tanta cunte dell’uerco,
     E co tanta taluorne e visse-visse,
     Che, quanno mette chella lengua nvota,
     Co na vocca de culo de gallina
     304Te nfetta, te stordisce, e t’ammoina!
Mar. A sta età de sommarre,
     Ea quanto vuoje, ca sempre tu le sgarro!
Col. Ma, s’un antro te stace zitto e mutto.
     308Caglia, appila ed ammafara,
     E se stipa la vocca pe le fico,