Paggena:Lo cunto de li cunte - Tomo I.djvu/250

     No toccuso, no pazzo, vetrejuolo.
     No tentillo, no fuoco scasa-case.
     Che te mette lo pede ad ogne preta,
     136Che te cerca l’arrisse co lo spruoccolo,
     N’ommo senza ragione,
     Una perzona rotta e senza vriglia,
     Che non è juomo, che non fa scarriglia;
     140Che fa stare nquiete li vecine.
     Che provoca le prete de la via;
     Nsomma, è stimato n’ommo, che vedimmo
     Degno de rimme, degno de no rimmo
144Mar. Zitto, ch’hanno ragione.
     Perchè perzona sapia ed aggiustata
     E chi se fa stimare senza spata.
Col. Ecco ne’ è no spizeca,
     148Uno muorto de famme.
     Uno stritto ncentura.
     Una vorza picosa, una tenaglia
     De caudararo, cacasicco e stiteco,
     152Uno roseca-chiuove,
     No cavallo senese,
     No cetrangolo asciutto,
     No suvaro suino, uosso de pruno,
     156Na formica de suorvo, no speluorcio,
     Mamma de la meseria, poveriello.
     Che, comme a no cavallo caucetaro,
     Nante darrà no paro de panello.
     160Che no pilo de coda;
     No grimmo ed aggrancato,
     Che corre ciento miglia,
     Né le scappa no picciolo,
     164Che darrà ciento muorze a no fasulo.
     Che farrà ciento nodeca
     A na meza decinco,
     E che non caca mai pe no magnare!