Paggena:Lo cunto de li cunte - Tomo I.djvu/230

230

Trattenimiento VIII.

autra femmena nsieme co le casce, che s’erano ngrannuto, secunno jeva crescenno. La femmena gelosa, visto sta bella orlatura, dicette saboto: Bravo, per vita mia!; chiave ncinto, e martino drinto! Chesta era la deligenzia, che non s’aperesse la cammara, azzò, non se vedesse lo Maumetto, che adorava drinto a le casce! Cossì decenno, la pigliaje pe li capillo, tirannola fore; pe la quale cosa, cascannole nterra lo pettene, se venne a resentire, gridanno: Mamma mia, mamma mia! Va ca te voglio dare mamma e tata!, respose la baronessa; e, nfelata comm’a schiava, arraggiata, comm’a cane figliata, ntossecosa, comm’a serpe, le tagliaje subeto li capille, e, facennole na ntosa de zuco, le mese no vestito stracciato, ed ogne juorno le carrécava vrognole a lo caruso, molegnane all’uocchie, mierche nfacce, facennole la vocca comm’avesse mandato pecciune crude. Ma, tornato lo marito da fore, e vedenno sta figliola cossì male trattata, addemannaje chi fosse. Ed essa le responnette, ch’era na schiava, che l’aveva mannato la zia, la quale era n’esca de mazze, e besognava martoriarela sempre. E, venenno accasione a lo signore de ire a na fera, disse a tutte le gente de la casa, pe fi a li gatte, che cosa volevano che l’accattasse. E, cercato chi na cosa, e chi n’autra, all’utemo, venne alla schiavottella. Ma la mogliere non fece cosa da cristiano, decenno: Miette puro ndozzana sta schiava mossuta, e facimmo tutte pe na regola, tutte vorrimmo pisciare a l’aurinale! Lassala stare, mal’ora, e non dammo tanta presenzione a na brutta siamma. Lo signore, ch’era cortese, voze,