Paggena:Lo cunto de li cunte - Tomo I.djvu/213

213

Jornata II.

de diente, quanto carreca d’anne, cossi àuta de scartiello, comme vascia de fortuna. Aveva ciento crespe a la faccie, ma era totalemente screspata; ché, si be aveva la capo carreca d’argiento, non se trovava uno de ciento vinte a carrino pò sorzetarese lo spireto. Tanto che jeva cercanno pe le pagliara do lo contuorno quarche lemmosena pe mantenere la vita. Ma, perchè a lo tiempo d’oje se darria chiù priesto na vorza de tornise a no spione magnamagna, che no trecaalle a no povero abbesognuso, stentaje tutta na scogna pe avere na cocinata de fasule, a tiempo che nce n’era tanta grassa a chille paise, che poco case non se ne chiudono le tommola. Ma, perchè: caudaro viecchio, vruognolo o pertuso, e a cavallo magro Dio le manna mosche, ed ad arvolo caduto, accetta accetta, scinta la negra vecchia, ed annottate li fasule, e schiaffatole drinto a na pignata, la mese foro la fenestra, ed essa jette ad abuscare quatto sproccola a lo vosco pe se le cocenare. Ma, fra sto tiempo, che jette e venette, passaje da chelle case Nardo Aniello, lo figlio de lo re, che jeva a caccia. Lo quale, visto la pignata a lo fenestriello, le venne golio de fare no bello cuorpo, e facette nguaggio - co li serveture suoje, a chi, cecanno chiù deritto, le cogliesse miezo co na savorra. E, commenzanno a berzagliare chella pignata nnocente, a le tre o quattro pantosche, lo prencepe, nzertanno a pilo, ne fece la festa. Jonze la vecchia a tiempo, che s’erano partute, e, trovato st’ammaro desastro, commenzaje a fare cose mardette, gridanno: Di che se stira lo vraccio, e che se ne vaga vantanno, lo