Paggena:Lo cunto de li cunte - Tomo I.djvu/206

206

Trattenimiento VI.

focarese, deze de pietto a la propia figlia, decenno: Che vao cercanno Maria pe Ravenna, si Preziosa, fìgliama, è fatta a na medesema stampa co la mamma? Aggio sta bella facce drinto la casa, e la vao cercanno nculo a lo munno! E, fatto ntennere sto penziero a la figlia, n’appe na nfruata e na lengoriata, che lo cielo te lo dica pe mene! Lo re, tutto nfuriato, le dicette: Vascia ssa voce, e schiàffate ssa lengua dereto, resorvennote stasera de fare sto nudeco matremoniale; autramente, lo manco piezzo sarrà l’arecchia! Preziosa, sentuta sta resoluzione, se retiraje drinto la cammara soja; e, trivolanno sta mala sciorte, non se lassaje zervola sana. E, stanno a fare sto nigro viseto, venne arrivanno na vecchia, che la soleva servire d’argentata. La quale, trovannola chiù da chillo munno, che da chisto, e sentuto la causa de lo dolore sujo, le disse: Sta de buon’arme, figlia mia, non te desperare, ca ad ogne male ne’ è remmedio, fore ch’a la morte! Orasiente: comme patreto, stasera, avenno dell’aseno, vo servire pe stallone, e tu miettete sto spruoccolo mocca, perchè, subeto, deventarrai n’orza, e tu sfratta, ca isso, pe la paura, te lassarrà foire, e vattenne deritto a lo vosco, dove lo cielo t’ha sarvata la ventura toja. E, quanno vuoi parere femmena, comme si, e sarrai sempre, e tu levate lo spruoccolo da vocca, ca tornarrai a la forma de mprimma. Preziosa, abbracciata la vecchia, e fattole dare no buono mantesinato de farina e doi felle de presutto e de lardo, ne la mannaie. E, commenzanno lo sole, comm’a pottana falluta, a cagnare quartiero, lo