Paggena:Lo cunto de li cunte - Tomo I.djvu/200

200

Trattenimiento V.

ee trovaje comme n’avesse avuto mai male. E Grannonia, comme vedette lo prencepe forte e gagliardo, disse a lo re, che l’attennesse la parola. E lo re, votatose a lo figlio, disse: Figlio mio, già te sì visto muorto, ed io te vogo vivo, e manco lo creo! Però, avenno prommisso a sta giovane, si te sanava, che tu lo fusse marito, già che lo cielo t’ha fatto la grazia, famme comprire sta mprommessa, pe quanto ammore me puorte; pocca è necessità de gratetudene pagare sto debeto. A ste parole respose lo prencepe: Signore mio, vorria avere tanta li- bertate alle boglie meje, pe dareve sfazione, quanto ammore ve porto; ma, trovannome mpegnato de parola ad autra femmena, ne vui conzenterrite, che io rompa la fede; né sta giovane me conzigliarrà, che io faccia sto tuorto a chi voglio bene, né io pozzo mutare penziero. Grannonia, sentuto chesto, appe no gusto ntrinseco, che non se porrla dicere, vedennose viva drinto a la mammoria de lo prencepe. E, fatto na tenta de carmosino a la facce, disse: Quanno io facesse contentare sta giovane amata da vui, che me cedesse sta partita, non te chiegarrisse a le boglie meje? Non sarrà mai, — respose lo prencepe — , ch’io scache la bella magene de l’amanza mia da chisto pietto! che me faccia conserva de l’ammore sujo, che me dia cassia tratta, sempre sarraggio de na stessa voglia, de no stisso penziero, e me porria vedere mpericolo de perdere lo luoco a la tavola de la vita, che io non farraggio mai ne sto cavalletto, né sto trucco. Grannonia, non potenno chiù stare drinto le pastore de lo fegnemiento, se le scoper-