Paggena:Lo cunto de li cunte - Tomo I.djvu/192

192

Trattenimiento V.

teo, lo foretano, che teneva pe messere: O tata, io me voglio nzorare! De grazia, — disse Cola Matteo — , trovarrimmo n autra serpe, comm’a tene, e farrimmo sta lega de poteca. Che serpe?, — respose lo serpetiello — , erame fatte tutte uno co le vipere e li scorzune! Ben se pare ca si n’Antuono, e fai d’ogne erva fascio! Io voglio la figlia de lo re; e, perzò, vattenne a sta medesema pedata, e cerca a lo re la figlia, e dì ca la volo no serpe. Cola Matteo, che jeva a la bona, né se ntenneva troppo de sti vottavarrile, jette semprecemente a lo re, e le facette la masciata, decenne: Masciatore non porta pena: si no, mazze quanto la rena! Ora sacce, ca no serpe vole figliata pe mogliere; perzò, vengo comme ortolano a vedere si potesse fare nonsierto de no serpe co na palommella. Lo re, che canoscette a lo naso ch’era no vozzacchione, pe levaresillo da cuollo, disse: Va, di a sto serpe, che, si mefarrà li fruutte de sto parco tutte d’oro, io le darraggio figliama. E, fattose na gran risata, le dette lecienzia. Ma, dato Cola Matteo la resposta a lo serpe, isso le disse: Va crai matino, e aduna tutte l’ossa de frutte, che truove pe la cetate, e ne semmena lo parco, ca vederrai perne nfilate a lo junco. Cola Matteo, ch’era fatto a la storza, nè sapeva leprecare, nè contradire, comme lo sole co le jenestre d’oro scopaje le monnezze de l’ombre de li campe adacquate da l’arba, nfilatose na sporta a lo vraccio, jette de chiazza nchiazza adonanno tutta l’ossa, che trovaje de perzeca, de gresommola, d’alberge, de visciole, e de quante nevinole ed arille