Paggena:Lo cunto de li cunte - Tomo I.djvu/150

150

LA COPPELLA

Fab. Affé, me vaje rescenno pe le mano!;
     Io devento na mummia, resto ammisso.
     So fere de me stisso!
     Ogne settenzia, frate, che tu spute,
     Vale settanta scute;
     Nce puoje dare a sti ditte co no maglio,
     Né te scazzeche punto
     Da chillo mutto antico:
     «La femmena è secunno la castagna;
     «Da fere è bella, e drinto ha la magagna».
Jac. Venimmo a lo mercante,
     Che fa cammie e recammie,
     Assecura vascielle e trova accunte;
     Trafeca, ntrica, e mbroglia;
     Tene parte a gabelle,
     Piglia partite, e tira le carate;
     Face vascielle e fraveca;
     S’enchie buono la chiaveca;
     Para la casa soa, comme la zita;
     Sforgia, comme a no conte;
     E fruscia seta, e sfragne,
     Mantene uommene, sierve e donne libere,
     Ch’ogn’uno n’ave midia!
     Nigro, si se copella!,
     Ch’è na recchezza n’ajero,
     È na fortuna nfummo,
     Fortuna vitriola,
     Soggetta a mille viente.
     A riseco de l’onne!
     E bella apparescenzia,
     Ma te gabba a la vista;
     E, quanno chiù le vide
     Fellusse a furia, e a pietto de cavallo,
     Perde tutto lo juoco pe no fallo!