Paggena:La Divina Commedia Napoletano Domenico Jaccarino-Nfierno.djvu/205

— 51 —

⁠

A Chironne lo Masto lo dicite
Risposta a isso dammo nuje de chesso,
Ca vuje pe niente ccà ve ncepollite.
Pò me smestette e disse: Chillo è Nesso
Che morette pe cierta Dejanira,
E se nne vennecaje pò isso stesso.
E chillo mmiezo che mpietto s'ammira,
È Chirone che fuje figlio d'Achille
Chill'autro è Folo che avette sempe ira!
Ntuorno a lo fuosso vanno a mmille a mmille
Saittanno chi pe ppoco esce da fora
Da lo sango, purzì nfra li capille.
Vicino a cchelle ffere jammo allora,
Chiron piglia na frezza, e co la cocca
La varva arreto vota a la bonora.
Quanno se scommigliaje chella gran vocca,
A li compagne disse: State accuorte,
Chillo d'arreto move zzò che tocca,
Non fanno zzò li piede de li muorte
Lo Masto mio s'accosta a chella parte
D'isso a lo pietto, e face l'uocchie stuorte.
Rispose: Comme vide, io ccà ammostrarte
Aggio le ccose ascure comme songo,
È pe necessità, e non è pe arte.
Biatrice a sentì 'n Cielo non stongo,
Nè no vivo a lo 'nfierno pò trasire,
Ca non è latro, e io scannalo non dongo.
Ma pe chella vertù che sto a sentire
Na strata meglio e chesta nce àve a ddare,
Ca stammo appriesso a tte Cesto a venire.
E la fossa pò doppo me àje a mmostrare,
Chisto che puorte ncuollo a tte tu stesso,
Ca spìreto non è che pò volare.
Chirone s'avotaje dicenno a Nesso:
Accompagna no poco ste pperzone,
E Cientaure cchiù non farce ì appriesso.
Nce 'ncammenammo co sto ciciarone
Pe la ripa addò sango nce volleva,
E strille llà sentettemo da stuone.
Nfì a ll'uocchie nfra lo sango ognuno steva,
E lo Cientauro disse: So ttiranne
Ch'ànno acciso, arrubbato a chi l'aveva.