Paggena:La Divina Commedia Napoletano Domenico Jaccarino-Nfierno.djvu/203

'A Wikisource.
Chesta paggena è stata leggiuta du' vote e mo è fernuta.
TERZA APPENDICE
------


N.B. Il seguente Canto essendo stato dal Traduttore due volte composto in epoche diverse, ei crede di pubblicarlo originalmente, non sembrandogli dover andare perduta tanta fatica.


CANTO DUDICESEMO
ARGOMIENTO


Arrivate li Poete a no luoco arroinato, trovano ch'era guardato a vista da no Minotauro. Scenneno abbascio a lo settemo piano acompartuto a tre ggire, e accostatese a lo funno trovano li Cientaure. Vergileo tanto che ffà, è portato tanto isso che Dante da uno de chiste Cientaure a ccoscia-cavallo jenno vedenno tutto lo primmo giro pe ncopp'a na striscia de sango, addò strellavano forte assaje li violiente contro a la vita e a lo bene de lo prossemo.


Lo luoco addò scennettemo era tanto
Sgarrupato, e pe chillo che nce steva
Che fatto avria jastemmà no Santo!
Qual'è chell'arroina, io rifletteva,
Che l'Adece da Trento subbessaje
Pe terramoto, o zzò che manteneva;
Che da ncoppa a lo monte s'acalaje
La roccia de montagna tutta scesa,
Tanto che nò nce fuje na strata maje;
Accossì de lo monte era la scesa
E llà vicino mponta a no fossato
Steva lo Minotauro a la stesa,
Che da na fauza vacca fuje figliato,
E se mozzeca tutto a nuje vedenno
Da l'arraggia e da mmidia cchiù nguttato.
Lo Masto mio dicette: Staje credenno
Si ccà nce fosse lo Duca d'Atene
Che se nfoscaje, la morte a te rennenno?
Va llà, animale, ch'isso nò nce vene
Mparato da la sora toja carnale,
Ma va vedenno si soffrite pene.