Paggena:La Divina Commedia Napoletano Domenico Jaccarino-Nfierno.djvu/131

— 133 —

E Nicolò che la costuma ricca
Scoprette lo caròfano addorato
A ll'uorto ch'à semmenta accossì scicca;
E fora chi sperdette nfaccia Asciato
La caccia co la vigna e co le ffronne,
E gran talento nce ammostaje Abbagliato.
Contro a Sanise, guardame e lo bbide,
Pecchè la faccia mia già te responne:
So l'ombra de Capuocchio, e a mme mo cride,
Fauzaje metalle co le mbroglie 'ncura,
E t'àje d'allicordà, ca chi mm'accide
Bona scigna mme chiamma de natura.

CANTO TRENTÈSEMO ARGOMIENTO

Dinto a chisto Canto lo Poeta parla de tre autre mmanere de fauzarie. De chille che ànno finto d'essere autre pperzone, mettennose lo nomme d'autre, la pena de li quale è de mozzecà chille che ànno fatte monete fauze. Chiste pò so cchille de la seconna manera e ànno pe ppena de tenè la Troppesia, e sta sempe arraggiate de sete. L'urdema è de chille che ànno parlato fauzo, e chisti tale stanno uno ncoppa a l'autro tenenno sempe na freva forta assaje. A ll'urdemo fa parlà lo Masto Adammo nzieme co Sinone de Troja.

Quanno Giunone carfettata steva
Pe Samalè contro a ssango Tebbano,
Comm'ammostato tanta vote aveva,
Atamante non fuje tanno cchiù ssano,
Che vedenno la sposa co li figlie
Jire ncasciata lesto p'ogne mmano,
Strellaje: Mettimmo rezza azzò che piglie
La lionessa o li lìune spisso,
E le ggranfe stennette 'mparapiglie,
A Liarco pigliaje, fuje primma chisso,
Lo rociolaje vattennolo a na preta
Che s'anniaje porzì nziemme co isso;