Paggena:La Divina Commedia Napoletano Domenico Jaccarino-Nfierno.djvu/105

— 107 —

Ma si essa è rrotta attiente, e tu te scanze;
Saglì potite ncopp'a cchelle mmure
De chella costa ch'àve brutte ausanze.
Lo Masto dà a la capo acalature
Dicenno: Non contaje bone le mprese
Chillo che sfrocoleja li peccature.
Lo Monaco: A Bologna io dire 'ntese
Li vizie do Diavolo, e sentette
Chi è bosciardo, e lo patre è de l'affese.
Lo Masto tanno lesto se nne jette
E nfuriato s'ammostaje llà chiaro,
E io da llà porzì pò mme partette
Jenno appriesso a lo Masto accossì ccaro.

CANTO VINTIQUATTESEMO ARGOMIENTO

Partute li Poete da la Sesta borgia, da dove esceno saglienno pe ncoppa a na montagna de prete sgarrupate, arrivano a la parte deritta. Po' vedeno na laria e profonna vallata addò mmiezo a sierpe, serpentune e serpetielle, a una e a cciento cape, vanno correnno ll'aneme de li mariuole a l'annuda e spaventate, che se ncenneresceno primma, e ppo' tornano a ccomparè, comm'a la Fenicia. Ccà li Poete trovano a Vanno Fucce mariuolo de Cchiesia, lo quale mmece soja facette ncorpà de l'arruobbo a no cierto Vanno de la Nona, che scelleratamente facette 'mpennere, ntramente sarria spettata a isso chesta pena.

Stevamo justo a lo principio d'anno
Quanno dinto a l'aquario sta lo Sole
E a mmiezo juorno già le nnotte vanno,
Quanno nterra già scennere nce sole
La neva che se specchia janca janca
E assaje durare tosta cchiù non pole,
Lo cafòne a lo quale rrobba manca
Se sose e tenemente la campagna
Tutta neva, e a guardarela non stanca;