Paggena:La Divina Commedia Napoletano Domenico Jaccarino-Nfierno.djvu/101

'A Wikisource.
Chesta paggena è stata leggiuta du' vote e mo è fernuta.
— 103 —


CANTO VINTITREJESEMO
ARGOMIENTO
Dante fà vedè comme songo persecotate li diavole, e comme isso fuje sarvato da Vergilio. Parla de la sesta borgia, addò mette li frabbutte giesuite, la pena de li quale è de portà ncuollo pesante cappuotte e cappucce de chiummo, ndorate da fora, e de ire sempe attuorno a la borgia. Nfra de chisti tale trova Catalano e Loteringo, Muonace Bolognise.


Zitte, sulille, e senza compagnia
Jevemo nnanze l'uno, e l'autro appriesso,
Comme fanno li muonace pe bìa.
E penzava a la favola pecchesso
De la ranogna, pe lo fatto d'oje,
E de lo soricillo muorto ciesso:
Ca mo nce aggio a penzà, vuoje e non vuoje,
Vedenno chist'appicceco de faccia,
Sentenno primma e doppe sti catuoje.
E comme no penziero l'autro caccia,
Accossì doppo io llà n'avette duje,
Ca la primma paura m'ammenaccia.
Io penzava accossì: Chiste pe nuje
So ccarfettate tutte tale e quale,
Tanto ch'ognuno già scocciato fuje.
E si mo ll'ira vò punì a lo mmale,
Appriesso cchiù sceppate ccà sarranno
Chille che venarranno a scale a scale.
Mme senteva arriccià li pile tanno
Pe la paura, e steva arreto attiento,
Quanno dicette: Masto, a tanto danno
mettimmoce annascuse a sto spavento
De Malebranche, e stanno già venenno,
Tanto che pare che già già li ssento,
E chillo: si foss'io specchio, e te ntenno,
Non potarria piglià la faccia toja,
Comme capesco quanto vaje dicenno.