IO PE TTE MORO!
Suonata con Chitarre.
I.
’O nniro ’e ll’uocchie mieie, bella, vuie site,
ma site amara e nun ve n’addunate,
e spicialmente quanno mme vedite
tanno mme pare ca v’amariggiate...
Coro:
E ’o nniro ’e ll’uocchie suoie, bella, vuie site!
Ritornello:
Passeno ll’anne, è overo,
passa ’o vierno e l’està,
ma ammore, si è sincero,
nun pò, nun pò passà!
Voce sola e coro: Nun po’ passà!…
Mo trase e mo esce fora,
si è chiuovo è chiuovo d’oro…
Tu mme vuò bene ancora!
E io pe tte moro!
Voce sola e coro: Tu lle vuò bene ancora! / E pe tte more!
II.
Dint’ a stu core mio l’anno passato
io ve purtava scrita e siggellata
mo avimmo tutte e dduie fatto ’o peccato,
mo vuie penzate a n’ato e io penzo a n’ata…
Coro:
E ve purtava scritta e siggellata!
Ritornello:
Passeno ll’anne, è overo,
ecc. ecc.
III.
Ma lassammo sti chiacchiere ’a spartata
chello ch’è succeduto è succeduto:
io sò nu nfamo e vuie na scellarata,
che ne parlammo a fa? Tutto è fenuto…
Coro:
E lassammo sti chiacchiere ’a spartata…
Ritornello:
Passeno ll’anne, è overo,
ecc. ecc.
IV.
Meza parola, e doppo ve saluto:
Pecchè, l’atriere, avite addimmannato
a n’amico d’ ’o mio cchiù canusciuto,
s’io steva buono e si m’era nzurato?…
Coro:
Meza parola e doppo ve saluta…
Ritornello:
Passeno ll’anne, è overo,
ecc. ecc.
