me a li miedece?… nzomma tu vuò che pperdo la pacienza e te scotoleo?
Luc. Si te venesse ncapo, vì, solamente si te venesse ncapo de mme guardà stuorto? io te donco no muorzo e mme magno miezo mascariello.
Mar. Auh! (fremendo) Vide che pprudenzia è la mia!… io mo vorrìa sapè tu perchè nce ll’haje co lo povero Maurizio e la sora che sso venute a alloggià co nnuje, e che se levano lo sanco da dinto a lì bbene, pe nce pagà 18 carrine a lo mese pe na cammera che tteneno affittata.
Luc. (sottovoce e con asprezza) Non li ddifennere, non li ddifennere ca tu sì pparta offesa… mo mme vuò fa parlà? mo vuò che te dico ca ll’uocchie tuoje stanno sempe ncuollo a Mmaurizio, co ttutto ch’è bidovo co no figlio, e se fa no tressette sempe co la calamitazione!… Famme sta zitta, non me fa parlà, te nne prego…
Mar. Siente, io non tenco nisciuna ntenzione de mmaritarme, ma si mme venesse ncapo… Maurizio non sarria no buono partito?
Luc. (con disprezzo) Sì, pe ghì raccoglienno monnezza… vattè, va te cocca tu e sta razza de sfrantummatune!
Ros. (dall’interno delle stanze a dritta ove figurasi la sua dimora) E ddice bene la principessa trippasfatta!
Luc. (dirigendo le parole ov’è partita la voce) Io non so principessa, ma so mmeglio de te, capisce? e ghiesce cca ffora che te nne voglio fa sentì quatto…
Mar. T’aggio ditto fatica, e sso doje vote.
Luc. Vì da che so bbenute sti scarfassegge
