Paggena:Altavilla - La sposa co la maschera.djvu/57

'A Wikisource.
Chesta paggena è stata leggiuta.
— 57 —


Pan. (Tu che ddice?) (piano a Nicolino)

Nic. Ha rriversato mezza pezza ad un servitore…

Pan. (c. s.) (Ha versato.)

Nic. (E riversato è più polito.)

Mau. (tra sè) (Bonora! Pulicenella ha fatto meza pezza!)

Nic. E gli ha promesso di fargli vedere…

Mau. Ah! jes: baibain.

Pan. (a Nic.) Che ha ditto?

Nic. Ch’è gghiuta a ppiglià li bagne.

Pan. (tra sè) (Co sto friddo!) (a Mau.) Potrei vedere la signora?

Mau. (fa segno che aspettasse) Stop.

Pan. Ma la signora comme se chiamma?

Mau. Madama Dicarocchie.

Pan. (a Nic.) E cchill’auto ha ditto Madama Quattrocarocchie!

Nic. (a Mau.) Monzù? poterrebbimo vedere questa madamma?

Mau. (difficoltando) Eh! ma… ma…

Nic. Aggio capito. Prendete, (gli dà una pezza)

Mau. (tra sè) (Aggio fatto na pezza; pozzo magnà tre gghiurne.)

Nic. (a Mau.) E accossì, potete scompiacervi di farci vedere…

Mau. (c.s.) Stop, stop. (entra a dritta)

Nic. (a Pan.) E mm’ha rummaso co la stoppa.

Pan. (indispettito) E tu ll’haje dato na pezza! puozz’essere arrostuto! accossì gghiette li denare? io te farria na schiaffata!

Cic. (a Pan.) Le ssopressate vanno a cquatto carrine?

Pan. Tu che buò da me?… (tra sè) Ora io mo sto corrivo co cchillo de la meza pezza!

Nic. E io co cchillo che ttene la stoppa.