ne de st’appartamiento, ha condisceso à ffa sta burla sentenno che se tratta pe la felicità de chillo povero D. Andreuccio co cchella bona figliola de Rosina. Lo guardaportone è n’auto compagno mio, e ttene ordene de fa passà quaccuno che lle pare a isso, e cchille che ll’avimmo ndicate nuje. Pulicinella è lacchè de la signora, e Mmaurizio è lo cammariero. Tiene ammente, che la signora se chiamma…
Car. Madamigella Dicarocchie, non ce penzà.
Tom. Ma guè, bada bene che tu haje da fegnere na cammarera forastiera, perciò t’aggio procurato sto bello vestito, onne la lingua ha dda essere mossa a zzumpariello…
Car. Per chesto saccio io comme arregolarme; ma lasseme capì, la signora chi la fa?
Tom. Non te lo ppuò mmacenà, videlo e rride. Io so lo masto de casa, e co sti mustacciune e sti barbette, manco Barbanera mme pò annevinà. Uh! accommènzano a vvenì gente, trasetenne e attenta all’operazione che haje da fa. (s’avviano per la dritta)
And. (trattenendoli) Aspettate, so io, so io. Lo gnore mme va trovanno pe mmare e pe
tterra, e io de nascuosto so benuto cca ncoppa e vvoglio vedè che nne suecede. Attente sa, sacciate fa, e Ndriuccio penzarrà pe buje. Mo veneno gente addavero, trasite trasite co mme. (entra con Carminella a dritta, e chiudono la porta)