Paggena:Altavilla - La sposa co la maschera.djvu/35

'A Wikisource.
Chesta paggena è stata leggiuta.
— 35 —

Pul. Vale ddì ca io vaco dinto a li bbabbasune?

Mau. Già.

Pul. E cquanno lo ddice tu ca sì de la stessa classa mia, io te ringrazio.

Mau. Io so… mm’avisse da fa arraggià, ma mme faje ridere, e tte voglio bene.

Pul. Penzammo mo a le ccose serie. Cca che se combina? io mme voglio nzurà; tu mm’è ditto na figliola casarinola; nce starria Mariannina, comme te pare?

Mau. Ma essa t’ha menato na zennata?

Pul. E che ll’è pigliata pe bufola?

Mau. Vì, tu ll’è piscata ancora?

Pul. A uso de tracena o vavosa.

Mau. Ntiènneme, bonora! Te sì spiegato?

Pul. No, no, Maurizio mio. Si io parlasse d‘ammore sarria lo stesso che mme pigliarria no descenziello pe la soggezione, e mm’avriano da renvenì co no piatto de scule e mmagna… Pensa tu pell’ amico moncevò, nce tiene la faccia e li muode, pe sti ccose…

Mau. Vì comme mm’appriette.

Pul. Me… so no povero bardasciello senza mamma e senza patre.

Mau. Povera bestiolina…

Pul. Bestiò, famme sta finezza.

Mau. E che mm’abbusco? tu saje ca io tenco no tortaniello ncuorpo da stammatiua.

Pul. E dde justizia, ogne premio aspetta fatica. Tè cheste so 15 rana; va buono?

Mau. A mmcraviglia! (tra sè) (Aggio penzato pe na cotta de polenta pe sta sera.)

Pul. Uh! la vì cca che assomma… a tte Maurizio, fatte annore.