Ans. (sorpreso) Comme!
Pul. Jesce fora, o pe lo Sole d’Agústo, te levo la mèuza e mme la faccio a la genovesa.
Mau. (riprendendolo) Pulicenè perchè faje chesto? senza sapè chi è sto signore…
Pul. A la puzza mme ne sondo addonato… jesce fora, (ad Ans.)
Mau. a Pul. Ma bonora…
Ans. Venite con me. (a Mau)
Mau. Eccome cca.
Pul. E ttorna! (a. Mau.): Non te movere da cca. (ad Ansel.) E tu jesce fora, o te scasso li betriate… jesce fora, jesce fora. (lo spinge, ed Anselmo via)
Mau. a Pul. Tu che mmalora è fatto! Chillo avrà dda essere no signore…
Pul. Chillo è no giovane d’usciere, te voleva carrià fora pe te portà a la Concordia, pe 30 ducale che haje da dà a lo mercante.
Mau. (fuori di sè) Uh!!!
Car. Gnò mo pozzo ridere?
Mau. a Pul. E lo preventivo?
Pul. Lo vì cca. (prendendolo dalla saccoccia e mostrandolo) Io ajere steva cca, venette ll’usciere nzieme co sto quatt’uocchie che se nn’è ghiuto, e mme conzigniaje sta sfogliatella.
Mau. E tu tenive sta caramella pe la tosse ncuollo e non me diceve niente!
Car. Gnò, chesta mo è ccosa da ridere?
Mau. E che rridere, la nasceta de mammeta! Comme bonora pago sti 30 ducate?…
Pul. Fa cunte d’avè la frussione, e quanno nce sta lo Sole non ascì.
