lo principale è addiventato no gammaro! «Puozz’avè na funa ncanna! E tu pe non nchiaccà li scarpe che stanno quatto carrine, te nne viene nseggia e mme faje spennere sè carrine d’affitto! jesce da Iloco!...» Mm’ha fatto na caucìata pe rringraziamento, e mme n’ha mannato. Io lesto so gghiuto pe ddispietto a nnomme sujo da lo cagnecavallo, e mm’aggio fatto dà tre ccarrine, pe mmagnà.
Car. Ah, ah, ah! mo nce vo lo rridere vi, comme sì pproprio nnoglia!
Mau. Tu, si no sbaglio, ogn’anno addeviente cchiù cciuccio!
Pul. È lovè? nzomma ll’essere ubberiente, mme fa chiammà co sto nomme? si io nchiaccava li scarpe che se sarrìa ditto?... so cchelle ccose vi che te fanno nzuperbì!... Manco male che mmo nce sta la signora co la mascara, e mme farrà addeventà ricco.
Mau. Uh! tu pure lo ssaje?
Pul. Io ajere stette cca cchiù dde u’ora aspettànnote, justo pe te lo ddicere. Anze venette cca na perzona che te jeva trovanno e pparlaje co mmico. Tu non saje niente? io dimane sposo.
Mau. Dimane! e sarraje patrone?
Pul. De mille ducate a lo juorno.
Mau. De rènneta o de capitale?
Pul. De rènneta. Vide che ccapitale nce vo p’ave la rènneta de mille ducate a lo juorno. Io m’aggio fatto pure lo cunto, e ssaccio quanto è tutta la massa.
Mau. E quant’è? facimmoce sto cunto.
Pul. Tu non sì ccapace?