Gaetano — Ho risposto adesso.
Usciere — Dopo 3 volte che v’ò chiamato?
Gaetano — Sissignore.
Usciere — Mbè, quanno ’o sapite allora assettateve.
Gaetano — Grazie tante.
Usciere — Niente!
Gennarino (a Gaetano) — E ve vulite luvà a nanze, me vulite fa vedè comme fanno chilli llà?
Gaetano — Ma c’àie da vedè, l’opera d’’e pupe? Mo t’’o ceco n’uocchio!
Raffaele (a Gaetano suonando leggermente il campanello) — Pss... pss...
Cancelliere — Sig. Presidente, pare che manchi soltanto la Papocchia.
Raffaele — E va bene, possiamo incominciare senza la Papocchia.
Felice — Io mo saccio se me fa male o me fa bene, a incominciare senza la Papocchia?
Raffaele — Giacomì, vattenne fore, e appena vene ’a femmena ’e servizio mia, me faje sapè si muglierema à fatto ’o mascolo o la femmena.
Usciere — Va bene, Eccellenza, (via)
Gaetano — Ma che tene a cova d’’e palumme?
Felice — Quà palumme, chella è ’a mugliera c’a da sgrava.
Raffaele (ai 2 guardandoli sott’occhio) — Nu poco ’e silenzio da quella banda (poi fa un cenno al Cancelliere d'incominciare a leggere).
Cancelliere ( prende un'altra carta e legge) — «In nome della legge, ecc. ecc. Noi Presidente ecc. ecc. con sentenza in data del 25 ottobre...
Felice (interrompendolo) — Eccetera, eccetera, (il Cancelliere si ferma e guarda Raffaele).
Raffaele (manda un'occhiata d’impazienza a Felice poi fa il solito gesto al Cancelliere di seguitare) — Seguitate.
Cancelliere (legge) — «Autorizziamo la signora Amalia Sciosciammocca, nata Maruzzella, a provare i seguenti fatti».
Gaetano — Come, ve jate a spusà a na maruzzella.
Felice — Che c’entra, chillo è cognome.
Gaetano — Anche il cognome dev’essere bello.
Felice — E già... è meglio ’o suio: Papocchia!
Gaetano — Se capisce, te ienca ’a vocca, Papocchia!
Raffaele (lazzi) — Pss...pss... (solito gesto al Cancelliere).
Felice — (È na funtanella chella vocca, m’à nfuso tutta ’a faccia!).
