viene, sarebbe bella! Gennarì, assettate, nun te n'incaricà.
Antonio — Va bene, Usciè, lasciatelo stare (tutti siedono).
Gaetano (Pausa, guardando Gennarino e Felice) — Oh! ma insomma vuie mo che tenite ncapo, che stu lazzarone ’o vulite fa sta vicino a me?
Felice — Lazzarone?!... D. Gaetà e che d’è sta parola? Sapisseve vuje chello che sape chisto.
Gaetano — Pecchè è istruito, è istruito?
Felice — Istruito? Chillo sape ’o fatto d’’o schiaffo.
Gaetano — Vi che sape, teh!
Felice (appoggiandosi con Gennarino sulle gambe di Gae.) — Gennarì, tu aie da dicere c’o schiaffo fuje tanto forte, ca me nturzaie tutt’’a faccia.
Gennarino — Va buono.
Gaetano — Oh! ma vulisseve ’na colonnetta, na scanzia, nu cuscino… pe sapé almeno ( poi a Gennarino gridando), E scostati… tu puzzi di cipolla che appesti!
Usciere — Pss… pss… Signori miei, nu poco e silenzio. Vi ò pregato c’o presidente se sta cagnanno....
Felice — A cammisa.
Gaetano (Pausa, s'alza e s avvicina a l'Usciere, mostrando Gennarino) — Puzza di cipolla! (siede).
Usciere — Levete ’a lloco.
Felice — Oh! Usciè, ma mo me pare che sia na mancanza ’e rispetto proprio a me. Vi ò detto ch’è persona mia, e quà deve stare.
Usciere — Ma quello puzza di cipolla!
Felice — E che vuol dire che puzza di cipolla, il signore questo à fatto colezione. D. Gaetà, ma ched’è sta cosa? Puzza ’e cipolla, e non puzza ’e cipolla… ve voltate da questa parte, e non la sentite. Mo me disgustate nu testimone pecchè puzza ’e cipolla!.... Questo à potuto, e questo à fatto colezione! (a Gennarino). Signore puzzate! (siede. A destra lunga suonata di campanello).
Usciere (annunziando) — La Corte! (tutti si alzano).
Gennarino (a Gaetano) — Neh!... Io pure m’aggia sosere?
Gaetano — Susete, assettete, a chi l’assigne!... (Gennarino s'alza).