Felice (alzandosi lascia vedere la mutanda) — E voi non parlate di mio padre.
Amalia — Uh! (ridendo). Chillo che s’à puosto nganna? Nu cazunetto?!
Felice — E io comme tengo stu coso nganna? (se lo toglie) Va bene… questo è stato un altro scherzo che m’avete fatto, m’avete combinato ’o sottacazone dint’’o piatto?
Amalia — A me? Aveva essere pazza, faceva’o scherzo cu isso.
Felice — Intanto si mo me vedeva quaccheduno, facevate ridere sulle mie spalle.
Amalia — E tu chesto faje sempe, faje ridere.
Felice — No, m’è piaciuto, invece del salvietto, il calzonetto. Ma questo, cara signora, lo porterò in tribunale; lo farò vedere al Presidente (lo mette sulla credenza, e da questa prende un libro).
Amalia — Faje vedè na bella cosa!
Felice — Mangiate voi, perchè io non tengo appetito.
Amalia — Oh! meno male, accussi sto cuieta (si mette a mangiare).
Felice (apre il libro, ed appoggiandolo alla bottiglia dell’acqua, si mette a leggere).
Amalia (prende la bottiglia e fa cadere il libro, e si versa un bicchiere d’acqua).
Felice (prende la bottiglia del vino e fa lo stesso).
Amalia — St’acqua assoluta com’è disgustosa (prende la bottiglia del vino per metterne un poco nell’acqua, e fa cadere il libro).
Felice — Ma insomma, stu coso addò vulite c’’o poso?
Amalia — Miettele addò vuò tu.
Felice — E voi m’avete levato ’o primmo e ’o secondo puoie ’a dereto… po dicite che so io.
Amalia — Nun nc’aggio badato, si no nun te deva tanta confidenza.
Felice — Nun aggia leggere neppure? E non leggiamo! (chiude il libro).
SCENA IV.
Michele e detti, poi Rosella.
Michele — ’E biglietti so’ state portate.
Felice — Bravissimo.
Michele — Eccellenza, fore nce sta Rosella che ve vo’ parlà.