Chesta paggena è stata leggiuta du' vote e mo è fernuta.
IX.
Quann’’a jurnata è moscia, ’n cumpagnia,
pe se spassa’, disegnano ’e guarriere.
Se mettono accuvate mmiezo ’a via
e fanno ’a folla, e songo artiste overe.
Uno fa nu Gran Turco d’’a Turchia
luongo pe quant’è luongo ’o marciappiere;
n’ato fa ’o scuto e ’a langia ’e ll’Argalìa,
n’ato fa Buovo, e n’ato fa Rizziere.
Po’ si pe ccaso sentono l’addore
de nu sconcecajuoco ’e pulezzia,
che vuo’ acchiappa’! Scappano sempe llore!
Quacche vvota nu turzo, ’a copp’’a mana,
arriva a ’o guardio e ’o tene cumpagnia…
ma ’a rocchia d’’e scugnizze è già luntana.
27
