Carm. — (accarezzandola) Tu te l’haie ’a piglià! Si no, comme staie bbona?
d. Vic. — Ne vuò nu cucchiarino? Iammo... pigliatella...
Giul. — È amara...
Carm. — (prende la bottiglia e versa in un cucchiaio un po’ di quel liquido) Iammo... sùsete...
Giul. — È amara...
d. Vic. — (le mostra un soldo) Iammo! Si t’ ’a piglie, te do nu soldo...
Giul. — (con gioia) M’ ’a piglio... m’’a piglio...
Carm. — (dopo averle dato la medela) Bravo!... Pare na santa...
d. Vic. — (dandole il soldo) E chisto è ’o soldo...
Carm. — (a suo marito) E tu nun vaie a’ suggità?
d. Vic. — Che buò! M’ha fatto tanta mpressione sta guagliona, ca me sento ’o core niro niro... Ma me n’aggia i’ pe fforza... Stasera s’ha da vutà ’o presirente...
Carm. — E si te fanno presirente?
d. Vic. — (ridendo) Eh, me facevano presirente!
Carm. — Pecchè, nun po essere?
d. Vic. — Io me ne vaco... Addio, Giuliè. (Giulietta lo saluta con la mano).
Carm. — Retirate ampresso... Io resto n’ato ppoco pe lle fa cumpagnia.. (don Vicienzo esce, chiudendo dietro sè l’invetriata) S’è fatto scuro... Vulimmo appiccià ’o lume?
Giul. — Ncopp’ ’o cumò nce sta ’a lampa.. (Carmela ravviva la lampada innanzi la Madonna).
Carm. — Tiene appetito?
Giul. — Sì...
Carm. — E che vuò? Di’...
Giul. — Nun pozzo tuccà niente. ’O miedeco nun vo’...(lungo silenzio). Donna Carmè, me vulite cuntà ’o cunto d’ ’auciello grifone?
Carm. — N’ata vota ’o vuò sentere?
Giul. — Sì, sì... me piace ’e sentere.
Carm. — E te staie zitta?
Giul. — (ponendosi la mano al petto) A parola mia!
