’A VISETA
— Amico, te si’ posto ’mpucundria!?
Amico, te si’ mmiso ’e malumore!
Nun te se vede cchiù pe’ mmiez’ ’a via...
’A casa che ce faie vintiquatt’ore?
— Che faie? ’Na posta ’a Vergine Maria
e ’nu credo a Gesù Nostro Signore.
E aspetto...
—Aspiette?...
—Aspetto, sissignore...
— E si è llecito? —
— ’A morte!...
— Arrassusia!...
—Arrassusia?... comm’è?... Chella già vene!
Trase... S’assetta ’e faccia... e se trattene...
Pe’ bia ca i’ dico stroppole e muttiette,
dice ch’è bello a ssentere... e me sente...
E ride... e ride; e tanto sbatte a ridere,
ca pare che cadessero cunfiette.
E tante e tanta vote — ’a mana ’e Dio! —
pecchè ’a trattengo n’ora alleramente,
i’ scanzo ’a morte a 'nu nemico mio!
