Chesta paggena è stata leggiuta.
288
Poesie
Vierno! E me ne ricordo ’na trentina.
Fa friddo. Lampe e ttrònele.
Chiove. Acqua e viente! ’Nu castico ’e Dio!
Ma me fosse scetato ’na matina
truvanno janca, tutta janca, Napule!
Nu’ sciocca maie ’ncopp’ ’o paese mio!
Vatrova quanto e quanto sarrà bello
a cammenà pe’ Napule
sott’ ’a neva che sciocca, senza ’mbrello!
Mettere ’o pede lieggio ’n copp’ ’o mmuollo
e farse tutto janco... Che decrio!
...pe’ tutt’ ’a neva ca te cade ’n cuollo.
Nu’ sciocca maie ’ncopp’ ’o paese mio!
O starse dint’ ’a casa rebazzato
c’ ’o naso ’nfaccio ’e llastre d’ ’o balcone.
Uno passa c’ ’o bavero aizato,
n’ato, senza cappotto,
n’ato currenno, scìulia...
e n’ato piglia ’mbraccia ’nu guaglione
pecchè... sta scáuzo!
